In reference to the all time Bollywood classic Ye Jawaani hai Diwaani
Pata hai, mujhe lagta hai mai Naina si hoon. Mujhe apno ke saath baithna achha lagta hai. Mujhe dheeme gaane lagaakar aasman dekhna achha lagta hai. Mai bahaut shiddat se apna kaam karti hoon. Mai hamesha wo perfection ko chase karti hoon. Mai mummy papa se bahaut attached hoon, unki baaten sunti hoon. Mujhe rules break karne mai dar lagta hai.
Maine is zindagi mai zyada kuch pagalpan nahi kiya. Mere liyen random parties mai jaana, ekdam se dost bana lena, kal ki fikar na karna, ye aasan kaam nahi hai. Kabhi kabhi logon ko meri life boring lagti hai, kabhi kabhi mujhe bhi apni life boring lagti hai. Mai logon ko khone se darti hoon, puraane doston ko chodna nahi chahti. Mai zindagi mai popularity nahi, bas ek bestfriend chahti hun, jo mere itte kareeb ho ki log hamaara naam confuse kar den, jo mujhe utta hi pyaar kare jitta mai use karun, aur jo mujhe kabhi na chode. Mera koi boyfriend nahi raha, kyunki koi pasand ho to use kabhi confess hi nahi kar payi. Kya karun, underconfident bhi jo hoon. Mujhe lagta hai ki mujhe kon pasand karega, mujhmai aesa kya hai? Par iske bawajud mai khudko pasand hoon. Hamesha nahi, aur bahaut zyada bhi nahi, par thodi thodi pasand hoon.
Mujhe der raat likhne se mohobbat hai. Mujhe Arijit Singh ke cheezy gaanon se mohobbat hai. Mujhe kittabon aur kahaaniyon mai kho jaane se mohobbat hai. Mujhe andhere mai akele, duniya bhar ki baaten bhula kar, befikar naachne se mohobbat hai.
Par maze ki baat ye, ki mujhe pagalpan se bhi mohobbat hai. Aur us pagalpan ka naam hai Bunny. Bunny koi ladka nahi hai, ek idea hai. Ek shaayar ka khwaab hai Bunny. Ek jeene ki bhookh hai Bunny. Ek zindagi dekhne ka nazariya hai Bunny. Aur mukhe is nazariye se mohobbat hai. Jin logon mai mujhe ye pagalpan, ye befikari, ye bhookh dikhti hai na, mujhe wo bhi is hi tarhan pasand aa jate hain.
Maine bhi aesi philosophy adopt karne ki koshish ki hai, par ho nahi saki. Opposites hain na Naina aur Bunny, shayad is liyen. Par wo Bollywood tha, aur ye zindagi hai. Is Naina ko uska Bunny nahi mil sakta. Infact Naina- Bunny ki jodi chahen kitti bhi 'bai god made for each other' lage, par ye jodi waqt ke imtehaan bardaash nahi kar payegi. Chahen jitti bhi koshish kyun na karo, chahen jitti bhi mohobbat kyun na karo, Naina Bunny jitta tez bhaag nahi payegi. Aur Bunny Naina ka haath thaame, do pal theher nahi payega. Wo dur aage nikal jayega, aur ye yahan picche reh jayegi. Wo chahen jitti bhi shiddat se chahen, Naina ko Bunny mil nahi payega.
Comments